نگران وزیراعظم کا اداروں کی نجکاری کا عمل تیز کرنے کی ہدایت
نگران وزیراعظم انوار الحق کاکڑ نے پی آئی اے سمیت خسارے میں جانے والے تمام اداروں کی نجکاری کا عمل تیز کرنے کی ہدایت کی ہے۔
تفصیلات کے مطابق نگران وزیرِ اعظم انوار الحق کاکڑ کی زیرِ صدارت پاکستان انٹرنیشنل ایئر لائنز کے حوالے سے اعلی سطح کا اجلاس ہواجس میں نگران وزیرِ اعظم کو پی آئی اے کے مختلف امور پر تفصیلی بریفنگ دی گئی۔
اجلاس کو پاکستان انٹرنیشنل ایئر لائنز کی مالی صورتحال اور نجکاری کے عمل کی پیش رفت سے آگاہ کیا گیا۔
اجلاس کو بتایا گیا کہ پی آئی اے کی نجکاری میں حائل تمام رکاوٹوں کو ہٹا دیا گیا ہے۔
نگران وزیراعظم انوار الحق کاکڑ نے پی آئی اے کے معاملات پر فیصلہ سازی میں تاخیر پر تشویش کا اظہار کرتے ہوئے کہا کہ ملک معاشی مشکلات کا شکار ہے اور قومی اداروں کا خسارہ ان مشکلات میں اضافہ کا باعث بن رہا ہے،عوام کے ٹیکسوں سے ان اداروں کا خسارہ پورا کرنا مزید ممکن نہیں۔
نگران وزیراعظم نے ہدایت کی کہ پی آئی اے اور خسارے کے شکار دیگر سرکاری اداروں کی نجکاری کے عمل کو مزید تیز کیا جائے جبکہ نجکاری کے عمل کی شفافیت کو یقینی بنایا جائے۔
انوار الحق نے کہا کہ ہوابازی شعبے کی اصلاحات سے عوام کو بہترین سفری سہولیات فراہم کی جا سکیں گی، خسارے کے ذمہ داروں کا تعین کرنا بہت ضروری ہے تاکہ اس کے تدارک کے لیے اقدامات اٹھائے جا سکیں۔
نگران وزیراعظم انوار الحق کاکڑ نے ہدایت کی کہ قومی ایئر لائن کی نجکاری کے عمل کو شفاف اور تیز تر کیا جائے تاکہ ملکی خزانے کو مزید نقصان سے بچایا جائے۔
اجلاس میں نگران وفاقی وزیر نجکاری فواد حسن فواد، مشیرِ وزیرِ اعظم احد خان چیمہ کے علاوہ متعلقہ اعلی حکام نے شرکت کی۔
کوئی تبصرے نہیں:
ایک تبصرہ شائع کریں